在此咱讀的此段經文，是頭一擺，可能亦是唯一的一遍，施洗者約翰及耶穌兩個人在同一個場面做同款的代誌，?在同一個侍奉的範圍，閣在同一個地區啲服事。?及?的門徒攏啲給人行洗禮。
一、眾人攏去伊遐
約翰的門徒來給老師報告：「拉比，以前在約旦河東岸及你做夥，你曾為著他作證彼位，你看，他現在啲給人洗禮，眾人攏去他那邊。」意思就是，無閣再來咱遮囉。
請問，假使你若在現場，毋知你的感覺按怎？豈會親像約翰的門徒按呢，看著人攏去耶穌及他的門徒那邊，感覺無saⁿ爽快，有失落感，甚至有一點點的嫉妒？
此件事的背景是：約翰已經給耶穌洗禮、閣替耶穌作證，約翰嘛有兩個門徒去隨耶穌，其中一個是彼得的小弟安得烈(約1:40)。現在留在約翰身軀邊的，通講是對約翰死忠的。
1.施洗者約翰的本業
咱想看覓咧，給人洗禮是約翰的本業，福音書給他稱作「施洗者約翰」(太3:1)，會通講，行洗禮是約翰的khâng-pàng(招牌)。就講他是出現佇曠野，嘛有真多人對逐所在來到他那邊，給他請教，認罪，閣請約翰給?洗禮。
諸個人毋是簡單一般的老百姓，嘛有宗教領袖(法利賽人、撒都該人)、貿稅的、阿兵哥攏來尋他(太3:7，路3:7-14)。約翰罵?講是「毒蛇」(太3:7，路3:7)，毋拘?猶是甘心樂意來到曠野，接受約翰的教示。
2.傳講赦罪的信息
「著悔改，領受洗禮，上帝就赦免恁的罪！」(路3:3)
約翰閣講，「著用行為證明恁有悔改！」(路3:8)
聽起來，約翰毋是啲給人定罪，是啲傳赦罪的信息！感謝主，他歡喜赦免咱的過失。約翰看著耶穌行倚來，就講：「恁看，上帝的羊羔，他欲除去世間人的罪。」(約1:29)毋拘他嘛一直啲強調，悔改毋是簡單放在心內，抑是講用嘴講講若定，著愛用行為表現出來：有權勢的毋通欺壓人，有賰的著分互人。華語講：「你們要結出果子來，和悔改的心相稱。」(路3:8 和合本2010)這才是上帝所歡喜，所鑒納，真實的悔改。
可見，給人行洗禮，叫人著悔改，這是約翰的本業，通講是他的專業。現在，就在約旦河邊的哀嫩，他的門徒來回報：眾人攏去耶穌那邊啦，用現代的話來講，就是：「人潮流失，人氣下滑」。聽起來，約翰的門徒是真著急。因為?是施洗者約翰的鐵粉。
二、約翰的反應
聽著門徒的報告，約翰的反應是：非常的歡喜。哪會按呢？約翰的頭殼有歹去無？
「眾人攏離開咱啦。」這是學生所看見的。?來給老師報告，看老師有什麼對策，有什麼計畫通給人群閣再吸引倒來。無拍算，老師竟然是真歡喜。
1.上帝賞賜 (約3:27)
原來，約翰的看法無同款。他講：「若毋是天賞賜，人?當得著什麼。」這是表示他的眼光放在上帝。「天」就是代表上帝。
在人及人的關係，若是給上帝考慮入來，整個的關係就無同款。約翰看萬項事攏是上帝賞賜，都愛有上帝的感動及帶領，人才會來他這邊聽他宣講信息。若毋是出在上帝，人?當做什麼，抑是得到什麼。
舊約有一個真出名的例，就是約瑟。約瑟因為兄哥無法度接受他做的夢，17歲(創37:2)就互兄哥出賣，到30歲(創41:46)，十三年久在埃及做奴才受苦，閣無代無誌互人誣賴，關落監。在他出頭的時本來會當報復，老父過身了嘛無有什麼通掛慮的，毋拘他給兄哥講：「以前恁對我的意念是歹，毋拘上帝的意思是好，今仔日才會當有即多人活啲。」(創50:20)
其實，有情緒是正常的。約瑟會當講出諸個話，會當寬宏大量來對待他的兄哥，一定有經過一段時間的掙扎。路尾手，都是因為看著背後有上帝的帶領及安排，才會當放開他的心，按下他的情緒，採取正面、積極的行動，無閣想許個報復的代誌，反轉給他的兄哥安慰講：「毋免驚；我會照顧恁及恁的子兒。」(創50:21)互?安心。就是在此個敬畏上帝的前提下面，約瑟才會當超越家己的感受，無閣再看兄哥過去按怎歹款待他。
2.清楚認識家己 (約3:28)
給眼光放在上帝，無論是教會的服侍，抑是家庭的大小事，攏會當應用。約翰給學生回答的第二句話講：「我曾講『我毋是基督，不過是受派做他的先鋒』。」
約翰清楚認識家己，他是先鋒，毋是基督。在他出世以前，天使加百列已經有給?老父講：「他會互真多以色列的子孫歸向主—?的上帝。他會用先知以利亞的精神及能力來做主的先鋒。」(路1:16)諸個代誌，約翰的老父在他成長的過程，一定攏有給他講。他做基督的先鋒，是欲「互父母及子兒和好，互背逆的人轉向來隨義人的意念，互子民準備好勢通迎接主。」(路1:17)
照約翰所領受，他真清楚家己的職份是什麼。他盡忠、執守本分，宣講上帝愛他講的話，做上帝愛他做的代誌。
在舊約，咱看著亞倫的角色有一點仔及施洗者約翰同款。上帝呼召摩西帶領以色列人出埃及，閣呼召亞倫幫贊摩西，因為摩西頇顢(han-bān)講話。摩西知影家己的缺點，所以他給上帝推辭幾若擺無成功，就及兄哥亞倫密切配合。出埃及記7:1講，摩西在埃及王面前代表上帝，亞倫是他的先知，意思就是代言人。這是因為亞倫的口才較好。
亞倫雖然是兄哥，一直攏持守本分，講上帝通過摩西愛他講的話，做上帝通過摩西吩咐他做的代誌，這及施洗者約翰同款。他後來有得著上帝賞賜他大祭司的尊榮。
羅馬書12:3保羅曾教示咱著愛按怎看家己。有時陣，咱會給自己看了傷高，有時看了傷低。看傷高，真緊就會發見家己並無赫呢好，煞感到心情無saⁿ好勢。看了傷低，嘛是會真鬱卒。無論叨一種情形，攏會給家己帶來困擾。保羅教示咱著慎重評價家己，華語是講，要「看得合乎中道」。
若閣較具體來講，都是愛知影家己的職份是什麼，毋是什麼，了解家己的恩賜在叨位，無在叨位。上帝交代咱的，著認真去做。彼個工作若是交代別人，著尊重他。按呢及其他兄姊做夥同工，就會當用長補短，會當閣較順適，嘛?互家己無必要的壓力。
3.認識基督 (約3:29-30)
約翰續接閣給學生講：「娶新娘的是新郎；新郎的朋友徛在邊仔，一下聽著新郎的聲就非常歡喜。」(約3:29)約翰認為耶穌是主角，是新郎，他是新郎的朋友，當然著愛歡喜。
其實對耶穌的認識，約翰是有成長的。他曾幾若擺講「我家己嘛毋識他」(約1:31,33)；毋拘最後他看著聖神降落來歇在耶穌頂面，就講：「我有看著，閣作證，此位就是上帝的子。」(約1:34)他知影耶穌是基督，所以才會當在學生面前講：「29所以，我的歡喜滿滿。30 他一定愈興旺，我一定愈衰微。」(約3:29-30)
在這邊我欲舉一個現代的例，就是內地會續接戴德生職位的何斯德（Dixon Edward Hoste, 1861-1946）。戴德生的故事咱較多人知，何斯德較少人識。咱可能曾聽過，在1895年有七個真聰明閣優秀的青年，互内地會差派，來到中國傳福音，?互人稱做「劍橋七傑」。何斯德是唯一毋是劍橋大學畢業的。毋拘在1900年左右，他才四十歲就受指派，續接戴德生成做內地會在中國的主任。此件事若用華語來講是「跌破眾人的眼鏡」。戴德生資深的助手(范明德)嘛真卬愕。何斯德一開始毋敢答應，後來謙卑順服。他實在是一個：
(1) 謙卑的同工，及人配合，家己無一定著出頭，
(2) 祈禱的領袖：他承認家己祈禱定定會走神，就iān-nā 行iān-nā 大聲祈禱，閣
替多多同工祈禱。
互我印象上深的是，義和團事件的時，内地會有58名宣教士及21個囝仔殉道。内地會無親像其他的宣教組織，要求清朝政府賠償，顛倒決定放棄此個權利，簡單仰望上帝的照顧及供應。
(3) 何斯德帶領內地會繼續向前，在困難中靠祈禱招募著203個新的宣教士。
寫他傳記的人引用歌羅西書3:3來形容他：「恁的活命及基督做夥隱藏在上帝內面。」這及施洗者約翰愛耶穌出頭，家己衰微同款，嘛真符合咱長老會加爾文的精神，毋是欲高舉抑是彰顯一個人，獨獨互上帝得著榮光。
三、施洗者約翰的影響力
施洗者約翰雖然講他家己一定會衰微，其實，他是一個真重要的人物。天使加百列在他出世以前，就給他的老父講：「他在主的面前會做大人物。」(路1:15)在新約中稱做偉大人物的，只有耶穌及施洗者約翰。約翰嘛是新約裡面除了耶穌以外，對出世到死攏有記載的人。
1.連死都做見證 (太14:1-2)
可能咱會想講，約翰死了實在有夠冤枉。無代無誌，為著一個跳舞的查某囝子，互希律王給他斬頭。此款代誌只有在獨裁政權下面才會發生。(咱希望台灣毋通閣再有獨裁政權的出現。這需要咱共同來努力。)毋拘施洗者約翰連死，甚至死了後，都攏啲做見證，發揮真大的影響力。希律王看著耶穌，連準講他是施洗者約翰閣活起來，繼續啲傳道理。
2.在遐有真多人信耶穌 (約10:40-42)
約翰福音第十章按呢記載：「40 耶穌閣過去約旦河對岸，到較早約翰給人洗禮的所在，在遐住。41 有真多人來見耶穌，講：「雖然約翰無行神跡，他所講一切關係此個人的代誌攏確實。」42 在遐有真多人信耶穌。」著會記得，約翰離開世間已經有一段時間囉，毋拘他在生的時，所傳講的話猶啲流傳，互人因為他來信耶穌。
3.猶太領袖挑戰耶穌權柄 (太21:23-27)
耶穌最後一遍入耶路撒冷，潔淨聖殿，閣在聖殿內教示人。祭司長及民間的長老來質問：「你靠什麼權柄做諸個代誌？什麼人互你此個權柄？」耶穌面對此個挑戰，反轉問?：「約翰給人洗禮的權柄對叨位來，是對天抑是對人？」?煞?曉回答。耶穌就毋插?。施洗者約翰的存在，他的見證，在此個關鍵的時刻，替耶穌辯護、給耶穌解圍，互耶穌在聖殿教導的事工會當繼續落去。
4.備辦耶穌及門徒的心，耶穌會上十字架 (太17:10-13)
耶穌開始教導門徒，他會互人釘死在十字架。門徒聽著諸個話，攏不敢相信，嘛無法度接受。阮來跟隨你，無功名富貴無打緊，豈講著看著你互人釘死，甚至亦著隨你去死嗎？
?問耶穌關係以利亞著先來的代誌。耶穌講：「我給恁講，以利亞已經來啦，毋拘人毋識他，反轉照?的意思對待他。親像按呢，人子嘛啲欲在?的手下受苦。」
施洗者約翰受到無公義的對待，互耶穌深深感受著，他嘛同款會受著此款無公義的對待。他在這邊給門徒先注預防射，等候代誌發生的時，?就會知，這不過是一個過程，攏是照上帝的計畫啲進行的。
結論：迎接聖誕
親愛的兄姊，時間過了真緊，今年已經來到十月底。咱啲欲迎接聖誕的來臨，今仔日咱做夥思考施洗者約翰的使命，他的看法及做法。他因為給眼光放在上帝，閣清楚家己的職份，認識耶穌就是基督，所以當眾人離開，攏到耶穌遐去的時，他會當坦然講：「他一定愈興旺，我一定愈衰微。」(約3:30)
咱慶祝聖誕，著學習約翰的態度及精神，注目看上帝，認識耶穌，認識家己，就會當給耶穌介紹互身邊的人，掃除人心裡的阻礙，給人的心準備好勢，來接受上帝通過耶穌基督賞賜互世間人的救恩。