3
Dante佇《神曲》的第一句話寫：「當人生半途，我迷失佇一座烏暗樹林。欲講出彼个樹林有外呢拋荒、肅靜佮曠闊，是外呢矣困難啊！」這就是我的心情。
講著曾麗雲，實在講，攏要怪彼暝佇KTV酒店，飲傷濟酒矣啦。因為建案的圖一直無法度通過，公司建築課的老李的有建議，所以阮才會按捺都發局的承辦王科員去飲酒唱歌。彼暝阮是三个人，一个人揀一个小姐來坐檯。王科員是三十出頭歲的緣投仔sàng，穿白seh-tsuh，一開始秘四秘四，菜鳥仔款，毋過坐檯的小姐一坐定，佮伊乾二杯燒酒落肚，伊膽頭在矣，手就攬佇伊的腰，腫頭仔蟯［ngiauh］咧蟯咧底烏白挲。哼哼，有影這款泡［phānn］查某的步數免人教，通世間哪會有菜鳥仔？自然仔自然就成做老鳥一隻。媽媽桑Dora假若無檯通轉，留佇阮的包廂直直添酒勸酒續落，閣參阮喝酒拳，阮就是按呢才飲一下傷濟去的。
曾麗雲並毋是坐檯的小姐，實在講，伊遐呢膨皮大面，媽媽桑Dora嘛無可能予伊坐檯；怹是踞佇土腳，專門擦桌仔、捧菜、斟酒的女服務生，人叫怹公主，怹佇包廂之間走桌服務，一般來講，是無人會去交睬著的。我想，一切就因為飲傷濟酒矣。
哼，我知影老李的平常時仔就看我無目地，我看，彼日伊是酒後吐真話，事實上為著佮我爭副總的位，我早就已經聽著袂少風聲。
怹三个小姐佇舞池給王科員攬咧唱歌跳舞的時，老李的提酒甌敬我，彼時陣伊已經飲甲一个面紅貢貢。
「唉，來啦處長，我老李的敬你啦！×××你要知呢，我敬酒，並毋因為我愛飲酒呢！」
「哦？」
「你愛知呢，吃人的頭路，我李某人，按呢飲酒嘛是姑不而將呢！望你小牽成啦！」
「老李的，講這敢是話？我先焦啦！三八兄弟，咱攏是吃人頭路啦，我敬你啦！」我飲焦，伊嘛飲甲焦。伊閣開嘴講：「無nooh處長，董的是恁丈人呢，你外清靠鬆勢咧，阿阮這，吃頭路人，佮你哪會比的？」
老李的大我的歲，子已經讀國中矣，伊本身閣是國立大學建築系畢業的，當年是建築師牌考無過，才暫時來滯阮丈人的公司的，想袂到一滯二十幾冬，牌猶是一直考袂過。伊畫出來的圖是袂bai2，毋過到旦猶閣要寄別人的名。我的丈人對這點真無諒解，認為老李的上進心無夠，「莫怪一張圖到旦審袂過！」為著這个案，老李的已經予阮丈人爸罵甲臭頭去。當然老李的有話講，伊認為就是伊自少年為公司拚命，才會錯過讀冊考牌的好時機。
「哼！董的講這哪會著？無扈斗啦！」伊時常按呢嚅。
相對，建築毋是我的本途，我是讀藝術的，圖加減會曉畫，毋過起厝是外行；我佮妻佇大學就熟悉，是因為妻，我才通有這个處長的頭銜的，所以佇公司，一寡生理的me5角，應酬外務的場面，確實嘛攏要老李的掣路。當然老李的話裡有剾洗，我聽會出來。伊飲酒了的目睭圓車車，我位伊的目神裡發見對我的恥笑，底笑我是吃軟飯的，精差無講出嘴爾。所以我真袂爽。
「講話敢就遮鹹？飲酒就飲酒，×！講阮丈人是何必？」
「這間公司是伊講準算，無講伊欲講誰？」
「你敢定著要按呢糟蹋我？」
「處長，我無這个意思喔！閣再講，我講的佗位毋著？若有好某，我嘛想欲娶一个著否。毋過，我有我的原則啦，比如講，若是因為按呢欲叫我背祖入教，哼哼這，我是做袂到的。」
「×××，老李的，你講啥×？恁爸入教佮怹啥致代？阿若照你的意思，我毋就是吃飯坩中央的，攏袂做主tsit？我給你講哦，尊嚴是一个查甫人的內褲哦，你攏免穿內褲行路呢？你家己袂泅，怪位我遮來是啥物意思？」
老李的聽我按呢講，嘛袂爽起歹，酒甌仔囥咧徛起來。
「你講啥×話？是誰袂泅？」
「我講你啦！」我嘛徛起來。
邊仔本底底唱歌跳舞的王科員佮三个小姐，聽阮底大細聲嚷，驚一趒，一下手恬落來，偆電視的音樂聲家己底彈［tân］。
老李的二蕾目睭gîn-òonn-òonn看我，用輕視的口氣講：「著啦，我是袂泅啦！毋過處長，你拄才講尊嚴是一个查甫人的內褲，借我給你改一句，若我看，內褲才是一个查甫人的尊嚴啦！怹爸李某人，尚起碼閣敢佮人嗆注［tù］，怹爸毋是某奴，怹爸的內褲是家己管的，阿若欲揣啥人褪就揣啥人褪，猶毋免給某報備的啦！哼這點查甫人的氣魄，誰做會到？」
「哼！」我給我的酒杯大力宕佇桌頂，內面的whisky溢溢出來，潑規桌。怹 hia小姐驚阮二个成實冤家起來，就位舞池行轉來膨椅這頭欲做公親。王科員緊抵薰予阮，媽媽桑Dora聽著聲，嘛闖入來。
我講：「哪會做袂到？無，來續攤嘛，小姐掣咧，你有查某人緣，我就無nih？毋免靠勢你老鳥囂掰，怹爸予你看一下仔世面！」
「哼哼！揣查某，開錢揣的有啥通囂掰？用錢搧七仔的步數啥人袂曉？我給你看出出啦，你連開查某的kioh數4都無啦！」
老李的講煞，頭斡過坐落。順這个勢，媽媽桑Dora佮靴小姐嘛揪我的手，按捺我坐落。王科員隨給la̍ih-tah拄過來，先為我點薰，嘴一面講：「唉呀，林少董，攏家己人，家己人嘛！」
媽媽桑Dora倚佇我的身軀，用手貼我的胸坎。Dora是三十外歲人，我才發見伊的芳水有一種野芳味，佮伊鈕掠的氣勢真四配。伊嘛講：「是啊，規氣算我毋著，給恁斟傷濟酒矣啦！我賠罪我賠罪，失禮hoonnh！攏家己人，家己人嘛！」
伊那講若iat手，叫外面的公主入來，伊吩咐講：「妹妹！桌仔擦一下！」
彼个妹妹提一塊桌布行入來，可能乾焦二十出頭歲，穿一條短短的牛仔裙，身軀囊一領粉紅仔色圓領的薄T-shirt，彼是怹公主穿的制服。伊na踞咧擦桌仔，膨皮的面仔na因為現場的氣氛出現緊張的表情。老李的講「你連開查某的kioh數都無」的大嚨喉聲，假若閣佇我的頭殼底轉踅，底激我。（哼！啥物腳數［kha-siàu］？你看咧，我欲揣誰就揣誰！）
「喂！這个公主，妳叫啥物名？」
伊驚一趒看我，閣斡過看Dora。
Dora講：「董的底問，妳是啞口喔？」
伊才細聲仔講：「我叫做曾麗雲。」
「阿妳幾點下班，我請妳吃消夜按怎？」
伊頭偃落。
「敢講妳毋免下班的？」
媽媽桑Dora輕輕仔起腳踢伊的腳倉，伊頭夯起來，用真青驚的目睭看我。
4
因為酒飲濟，我的頭殼直直tiuh。我家己掣曾麗雲出來，落計程車，曾麗雲假若一隻狗仔子仝款綴佇我後面行。
「董的，我敢會使問你，消夜吃了我敢會使先走？因為我續落閣有一个班要上。」伊講話的聲調真細膩，驚我受氣的款。
「閣有班？」
「嗯。」
「閣有班？妳敢有必要hiah拚？」
「我想欲儉一條錢。就是為著按呢，我想，較拚咧，按怎，攏無要緊矣……」伊的目睭一直看土腳。
（嗯？按怎攏無要緊？）
若講佇彼款所在上班的查某是外呢高尚，這我毋信，哼就算講只是捧菜的公主嘛仝款啦。這是一向我對曾麗雲這款查某囡仔的判斷。
我的心肝頭有一个想欲冒險的感覺蟯起來，有一口濁濁的氣塞佇胸仔。（你連開查某的kioh數都無啦！）伊講「按怎攏無要緊」的時，敢有考慮著彼項代誌？就算我知影冒險真害，我嘛無法度阻止家己鑽入彼个深坑。我看著路邊Hotel的看板燈火閃熠，心內想，老李的講的無毋著呢，我敢敢給伊掣入去hia？
阮經過的巷仔口，有一个青瞑的阿婆仔底賣刮刮樂5彩券，伊孤單一个，直直招呼人買，生理真嫼的款。曾麗雲要我停一下，伊位伊的皮包仔扲二百箍出來買，因為動作笨閣青狂，零角仔落規土腳。伊踞落去抾，直直給我講歹勢。阿婆仔給彩券提予伊的時給說多謝：「小姐，妳好心會有好報喔！」
「哦，想袂到妳hiah有愛心呢……妳毋是講欲儉錢，煞閣按呢開錢買彩券？敢講妳成實相信彼錢是怹得的？」
「錢是誰得的我毋知矣，毋過，若是行過無買，我就會直直想這件代誌……按呢足討厭的，所以，規氣就買矣！」
佇港邊的小pub，阮叫小菜來吃。五彩燈耀佇伊的面，伊的目尾有青春的色水，予原底膨皮的面無hiah歹看。我嘛注意著，伊乾焦是面較膨皮爾，論其實，伊的身軀瘦中帶柔，有嬈玲瓏的身材骨格；阿伊勻勻仔、小可夯懸閣司奶的聲調，嘛給五彩的燈影加添一款放散［pàng-suànn］的野味佮風情。
伊離開座位去洗手的時，我叫服務生來，問伊若請查某囡仔飲要啥物酒較好，伊的表情神秘，給我睨一下目，講：「長島冰茶。」
「哦？」
伊給聲壓低講：「長島冰茶其實毋是茶，是酒，因為甜甜，一般查某囡仔飲較會落，所以給名號做茶……毋過它的酒精分真重……先生你是老鳥，這應當知影才著啊！」服務生講「老鳥」的時，戲謔［hì-hiauh］的笑容予我真袂爽快，假若已經認定我頭殼內的數想。毋過我猶是吩咐伊捧彼款酒來。
伊行轉來，並無問酒是啥物酒，杯甌仔捧起來就假若底吸可樂仝款吸幾若嘴，伊khok-khok吸，我想欲叫伊莫吸hiah雄，毋過我無開嘴。酒飲落了，伊規个面放鬆矣，講話的聲調嘛懸起來，原底猶小可有的生份佮秘四一下手攏失蹤去。
「這款酒無像酒呢，董的，這是我飲過尚好飲的物件呢，奇怪……是按怎較早毋知………我足呆的著否，董的？」伊續落講：「你敢知影我的朋友攏叫我啥？」
「我哪會知。」
「哈哈怹攏叫我膨呆啦，足好笑的著否……膨呆，你敢會感覺我足膨呆的？」
我擔一下肩，講：「袂啊！只是喂，妳叫我Arthur就好，彼是我的名。叫董的足礙謔的。」
「喔，Ar-thur…這酒哪會遮好飲…」伊的面斡東斡西四界相，表現出假若對啥物攏無致重的輕漂範。伊膨膨的面這馬紅吱吱。我想伊的酒量無好。
我問伊：「阿妳……敢bat陪人客出來？」（大概嘛無人會揣伊我看！）
伊搖頭。
「若按呢，妳今仔日是按怎欲陪我出來？」
「因為是Dora講的啊，我袂凍予伊無歡喜，按呢我就無頭路矣。唉Arthur，人啊阮就是傷憨矣啦，讀無冊，阮hia的烏面三媽嘛按呢給阮母仔講，講我一世人就注定是按呢……所以我乾焦會曉四界做寡無路用的空缺爾…」
「除了公主妳閣做啥？」
「足濟啊，啥物攏做呢。」
伊相東相西、na講話na揪頭毛。毋知為啥物，妻的形影雄雄嘛店我的頭殼內浮花，予我真僐。我雄雄感覺老李的話裡有真實的一面：位我娶妻的彼日開始，「某奴」二字恐驚就注定要綴我一世人矣。阿若按呢相比評，親像曾麗雲為著錢甘願行入嘻嘩的蹉跎間仔做空缺，看來嘛毋是啥物特別稀奇的代誌。
我想起晉前我給阮老爸講我欲洗禮的時，伊講：「若按呢，恁爸死，你這个不孝子欲捧斗否？」
「阿爸，毋是按呢啦。」
阮老爸的面虯［khiû］做一丸，講：「毋是按呢無是按怎？猶袂娶就急欲做某奴矣敢毋是？」
我問曾麗雲：「妳講妳啥物攏做？比如講咧？」
「比如講，洗大樓啦、佇菜市仔口賣囡仔衫啦、加油站加油的啦、總機 小姐啦……」
「總機小姐？」
「嗯，就是半暝專門接無聊查甫電話的彼種……」
「喔？」
「妳是講彼種0204的電話？」
「是啊是啊，就是彼種電話啊，Arthur。敢講你攏無敲過啊？嗯，我毋信！」
我毋知影家己哪會搖頭。我gió著伊的勼脊後的方向，拄才的彼个服務生笑笑仔看對這爿來，表情真龜怪。
我講：「哪會欲做彼？接彼款電話，足無聊的敢毋是？」
彼是假仙假tak的聲調，我予家己講的話驚一趒。實際的狀況是，酒精定著已經佇我的頭殼內起酵［khí-kànn］，燥嚗嚗［sòo-pia̍k-pia̍k］的豬哥蟲佇我的規身軀蟯嗤嘈［ngiauh-tshī-tshā］趖。我想起我嘛bat敲過彼款電話，伊嘴裡所講的彼種無聊的查甫人……
──彼是洗禮了後我所敢做的尚大的冒險，尚奇怪的是，竟然就發生佇洗禮了彼工的暗暝……
「只是一个空缺嘛！」曾麗雲給嘴翹起來講。
「空缺？阿若等一下妳莫上另外一个班，我掣你去另外一个所在咧，妳敢欲去hannh？」
「彼……就要看是……啥物所在矣……」伊頭偃偃，緊張緊張，手一直tsun7伊的皮包仔帶。我雄雄感覺伊的聲，真親像彼工暗暝，我佇0204電話彼頭聽著的查某囡仔的聲──幼幼仔假作底哼，有淡薄仔悲傷的聲。
「林柏年，我奉聖父、聖子佮聖神的名問你，你敢接受耶穌成做你生命的救主，一世人行十字架的道路，跟綴祂無離？」
「是，我接受。」
我想起我受洗的時，牧師滴水佇我偃低的頭殼頂，我的目墘澹澹，假若有目屎流落來；毋過我的目屎絕對無妻的濟。妻講彼是伊所看過尚感動人的洗禮，伊講：「因為，這是你的洗禮啊，你敢知影我等這日等外久矣？」
這是我娶伊晉前的代誌，彼時我感覺伊時常有一種溫純的表情，有一種值得一世人追求的嫷──彼，恐驚是我接受彼个儀式尚大的原因。毋過這當然毋是洗禮的本質，逐擺想到遮，我攏感覺真不安，有一款欺騙上帝十字架的感覺……事實上，我是為著佮妻結婚，才決定洗禮的，這个事實永遠無法度改變。阿洗禮彼日暗暝，會刁故意敲0204的電話，敢毋是為著欲給家己提醒這項？
因為熠［sih］過十字架的畫面，我感覺一陣抱心。我講：「暗矣，你是毋是應該敲電話叫恁盼仔6來載妳矣？」
「Arthur董的，你滾笑。我無男朋友啦。」
「哦？」我看伊。伊毋敢看我。我講：「妳有！」
「我無啦！」伊受氣矣。
「若無男朋友，hiah呢拍拚趁錢創啥啊？」
「我無要給你講！」伊按呢應的時，二紲目屎就流落來，掛佇伊膨膨無真嫷的嘴髀。我小可予伊雄狂的目屎驚著，恬恬無講話。
過一下仔伊皮包仔揹咧，徛起來。伊講：「阿你拄才講欲掣我去佗位敢毋是？行啊！」
（我已經看出出矣！你連開查某的kioh數都無！）
我的規身軀大大力tshiak一下，假若予電流拍通過……
4 kioh數, kioh-siàu, 膽識也。
5刮刮樂 粗斜體字表北京語發音，以下同。
6 盼［phàn］仔, 男朋友。 ~未完待續~
編按：本文乃本會曾任《台灣e文藝》、《台文戰線》總編輯與台文筆會秘書長，著有多本台語小說與詩集的年輕作家，曾得過2008年台灣文學獎台語小說創作金典獎、王世勛文學新人獎小說首獎、海翁台語文學獎小說類正獎等，得獎無數，還對於台灣人長期被殖民的歷史和困境，以及台灣平埔族的演變，有著深入研究的胡長松兄，從台語文學的角度所撰。文中有×的記號，乃較為粗俗的台語，在週報上不便顯示，因而以此作為代替。特別藉此說明與致歉。