5
出門晉前，我專工去陽台看彼隻白耳仔，因為伊已經一暝無叫嘛無跳。雄雄恬落來，對這款病鳥來講，並毋是好代。論其實伊會使算是一隻袂嫼看的鳥仔，毋過耳仔邊白色的毛一直生到目睭四箍圍，看著袂輸是白色的目睭遮，予人無真坦白的印象（敢講鳥仔嘛有親像咱人的人格？）伊一身軀的毛，已經予伊家己lè甲大孔細離，掠我金金相的目神假若有真深的怨恨。就因為這个予人袂爽的目神，我想欲給放出去；毋過，嘛因為這个予人袂爽的目神，我無想欲予伊遮呢好吃睏。我乾焦給綁鳥籠仔門的幼鉛線解開，哼阿伊若有頭殼有才調，就應當家己給籠仔門托〔thuh〕開飛出去毋才著。
我佮曾麗雲約佇中晝。
約佇中晝，當然是無向望妻問，更加無向望任何人知影這件代誌。彼擺的大建案順利進行了後，我升做副總經理，佇三面倚窗的辦公室，我看著透早的日頭給街仔路耀甲金siak-siak。
我拄坐好勢，秘書就入門來講，我的丈人爸董的欲約我吃中晝。我只好請伊回覆，講我已經佮一个營造商先約好矣，所以要改一个時間。續落過無外久，秘書閣入來，問我講是欲佮佗一个營造商吃飯，因為建築課老李的已經掣大東營造的人到位，嘛是想欲確定中晝吃飯的代誌。我給伊講：「毋是大東營造，我中晝是欲佮三石營建的人吃飯。妳去給怹講。」
秘書行出去了後，我恬恬看大樓下面的街仔路，車輛來來去去，我對怹的人生好奇起來。確實人佮人之間，生活的水準就是差hiah濟袂比評tsit的。阿怹 hiah無才調的人常在講我是吃飯坩中央的，彼又閣是按怎？敢毋是怨妒爾？相對來看，哼哼我真清楚，妻所予我的一切，無別人會使予我，這就是一切原則的原則，雖然，我無通選擇……
講著曾麗雲，若毋是驚長暝厚夢，我實在真毋甘願睬伊，閣再講，哼彼款戲棚頂的戲，戲棚腳何必閣搬咧……
我感覺真荒譀，彼一暝，長島冰茶的勁尾力假若真強，所致路尾我掣伊入去旅社內的情形，遂連我家己嘛無啥大印象矣……閣較譀的是，經過一段時間，伊的面到底是生做按怎，規个遂嘛愈生份矣。（若閣一擺，我嘛無想欲佮伊鬥陣喔！）
中晝烏雲位海彼爿來，一目睨就開始落西北雨。我佮伊約佇阮K市捷運R12站的一號出口路邊，我駛車過載伊；毋過我到位的時，伊猶未出現。雨那落那大。我給車停佇路邊等，伊過10分猶未來。我敲電話予伊，伊電話中的聲真雄狂款，直直會失禮：「唉呀，Arthur董仔，你到位矣喔，歹勢，因為發生一寡代誌，請你小等一下，我連鞭到矣hoonnh！」
我繼續等，一直到伊叩我的車窗──若無是伊叩，我根本就認袂出來，伊已經有身差不多五六個月矣，一圈肚，歸身軀是強欲走樁去的形，原本就膨皮的面這聲變甲膨閣兼腫。（誠實的，我毋bat看過遮嫼的查某！）伊夯一枝雨傘，毋過傷細枝，肩胛頭一下手就予雨潑澹去。
我開車門喝：「緊入來！」
（喔這个查某，哪會變這个款？）
我的心肝窟仔搐一下，感覺真歹吉兆。
伊拄坐好就那喘那講：「遲到失禮啦。拄才我欲坐捷運的時，有一个囡仔的雨傘佇亭仔腳，予風吹歹去，伊哮甲，講伊會予怹老母槓死……所以，我只好給我的雨傘先予伊，我閣斡轉去厝提。想袂到，一差差hiah久。失禮hoonnh！」
「阿妳的腹肚……妳結婚矣呢？」
「歹勢，雨傘給你滴甲規車。對啦，我就是為著這來揣你的。其實我無確定啦這个囡仔，我猶毋知伊…是阮男朋友的，抑是…你的…」
「啥！妳莫烏白講！」
「其實我本底無想欲給你講的，我按算家己欲給囡仔生落來飼的…我誰嘛無想欲講…閣再講，我若揣你，我知影你會誤會……」
「等一下等一下，妳先給我講，妳彼時陣毋是給我講，妳無男朋友？哪會這馬閣講無仝話？到底是按怎？」
伊講伊的男朋友彼時陣博輸儌，欠人錢底走路，無要人知。閣再講，佇蹉跎間仔，無人會承認彼的。
「所以妳彼時陣hiah呢拚性命趁錢，嘛是為著予恁男朋友還數？」我對這一切半信半疑。
「嗯！其實毋是全攏予阮男朋友啦，閣有一寡予阮朋友，怹講欲做生理……」
「阿伊這馬人咧？我是講妳的男朋友。」
「走矣！」
「走去佗？」
「我毋知啊！Arthur董的，我足呆的著否？」
「阿伊是按怎欲走？」
「攏是我毋好啦，因為伊叫我給囡仔提掉，我毋要。我給講，我一定欲給腹肚內的這个囡仔生落來。我閣給伊承認講，囡仔無確定是伊的。伊一受氣，罵我楊花水性，給我揌〔sai〕一下嘴髀，就走矣！」
（世間哪有遮憨的查某囡仔？）
「阿恁厝裡的人咧，怹滯佗？」
「怹滯庄腳，厝裡無錢，囡仔閣濟，我國中讀無了，就綴阮男朋友走出來矣，阮老爸講我尚好永遠莫轉去！」
（哼果然是欲來討錢的爾。）
雨雄雄痟落，落甲我給雨摔〔sut〕仔開上大磅，猶是看無路。我只好給車先倚店路邊停，句在雨淋。
「失禮啦！Arthur董的，我是想講這件代誌，你可能會想欲知影，所以毋才會……是按呢啦，彼日我做產檢，醫生講我有啥物妊娠毒血症，伊勸我要給囡仔提起來……毋過我毋敢作主……」
「妊娠毒血症！會按怎？」
「醫生講，我的血壓傷懸，囡仔可能會危險……」伊哭起來。
「阿妳咧？」我看伊面色真嫼，嫼甲毋成人。
「只要囡仔好勢，我……我是無要緊啦！」
我想想咧感覺毋著，緊給車發起磅，位病院的方向駛去。
6
我直直感覺勼脊骿有二蕾目睭底gió我，予我的勼脊骿那來那燒落。
應當有人暗暗底跟蹤，好定是我尚提防的老李的──我後壁的彼台轎車親像就是伊的。
一路聽曾麗雲講我才知影，伊落跑的男朋友根本就是sut仔，伊給伊位故鄉掣出來了後，就一直開伊的錢，閣瘋儌愛博〔pua̍h〕。伊是太子爺公的乩身，落跑晉前的穡頭，就是逐日佇怹滯的hia的王武宮練八家將。毋過怹跳八家將的攏是愛博無藥醫。伊bat想過欲離開伊，毋過伊逐擺攏提太子爺公的名出來做嚇〔hánn〕頭，伊會驚，遂就毋敢走，才會綴伊四界滾絞沐沐泅。伊走了後，伊認為腹肚內的囡仔原來是來解救伊脫離苦海的，所以伊按怎嘛欲給生落來。
伊講這馬無法度做「公主」矣，大部份的時間攏揣散工仔烏白做，最近，伊綴辦桌的廚子〔tōo-tsí〕四界走，就是按呢，才會一个面烏綠綠。
阮去到郊區的彼間教學病院，醫生檢查了，講確實是真嚴重的妊娠毒血症，伊的血壓佮尿蛋白攏傷懸，腎功能的指數嘛嫼。醫生講：「恁要好好仔做一个決定。囡仔活命的機會乾焦三十葩，而且就算活落來，嘛袂健康；我建議給提掉，若無，太太的部份嚴重的時可能會有腦出血、腎衰竭佮肝衰竭等等現象，性命危險。你敢是囡仔的老爸？」
「呃……」我真勉強揕頭。
「恁要做一个決定，我認為無必要冒險，要囡仔，就等較健康的時，隨時會使閣有嘛。這擺囡仔先提掉，對孕婦是較好。」
實際上，假使囡仔成實是我的，我想著我的地位佮前途，敢有可能會想欲留這个囡仔？（無可能嘛！）
醫生閣一擺講：「若是阮太太，我想我會按呢做。閣再講，太太……猶hiah呢少年！」我想，醫生定著有看出啥物。
我斡頭看曾麗雲，伊的面因為嚴重的水腫，目蚶歪tshuah去，實在嫼甲袂認tsit。我順醫生的話嚅講：「嗯，若醫生按呢講……我看……也是給提掉好啦！」
伊聽我按呢講，乾焦覕喙〔bih-tshuì〕，頭偃偃，過一下仔才細聲仔應：「這，我想是免考慮矣，我會家己給囡仔生落來，按怎攏無要緊。你毋免睬我。」
佇病院的大廳，我感覺彼二蕾目睭閣出現矣，我斡頭，是老李的無毋著，伊徛遠遠看我，真無好心款；毋過真龜怪，目一睨，伊的影跡就隨閣無去。我四界相攏相無，乾焦勼脊骿彼二葩燒落的目神猶佇咧……
舞規晡落來，我送曾麗雲到厝已經是盈暗矣。妻直直敲電話予我，毋過我無心情接。我感覺真忝頭，先倒轉去辦公室休睏。
窗仔下的街路，粒積的雨水反耀搖顯的燈仔火，佇玻璃窗的水霧中tòo開，成做一幅水彩的夜景……我感覺家己是徛佇一隻風雨的船頂，頭殼起楞〔gông〕。
（就當做無你的持代啦！）我的心按呢給家己講。（攏莫睬伊。莫承認。莫閣接伊的電話、莫見伊、莫想伊，就當做完全無這項。閣再講，囡仔無一定是你的。伊只是一个軟稚的查某，伊無法度影響你所有的這一切。予消失去！）
按呢想，我的心暫時較定著落來，妻敲來的電話聲閣喨矣，我給接起來。
「你是走佗位去啊？電話攏毋接！吃飯矣袂？」妻責備我。
「佮廠商講生理啊，這馬才轉來到辦公室。吃過矣。」
「按呢你緊轉來，我有代誌欲講。爸爸嘛來佇厝裡喔！」
「啥物代誌？」
「唉呀你哪會hiah囉唆啊，緊轉來就著啦！」
「喔！」
我倚佇窗仔，雄雄感覺家己就袂輸是厝裡彼隻白耳仔，阿辦公室就袂輸是一个吊佇半空中的大籠仔，我佇hin lè過來挵過去，佮彼隻鳥仔無啥物精差……按呢的想法予我家己驚一趒。
（你莫閣去想彼个可憐的查某矣啦！）
（唉，我做袂到。）
「柏年，加油！」我猶會記洗禮彼工，妻的老爸是按呢貼我的肩胛頭的。（加油？）彼時我完全無法度理解這二字內面的意思。特別是，這个信仰一開始，就不過是我想欲得著啥物的手段爾。妻。空缺。錢。閣有目下的一切……毋過這馬我嘛知影，因為濫著無真實的部份，我失去一寡物件。我已經小可了解矣，gió佇我勼脊骿的彼二蕾目睭，有可能是老李的的，有可能是我的丈人爸的，有可能是妻的，有可能是曾麗雲的，嘛有可能是我無熟悉的任何一个人的──敢講這是我的丈人爸給我講的「加油」的意思？
無睬，傷慢矣，我閣想起曾麗雲的面，規个人就畏寒。而且老李的嘛可能知影矣，我的一切真緊會烏有去。（明仔載伊會佇公司按怎講？哼！敢講就為著一个可憐的憨查某？）目睭瞌瞌，我無張持去想起Caravaggio的彼福「聖母之死」的圖。Hin有一个歹看膨皮的聖母瑪利亞，雖罔平凡毋過透露尊嚴高貴的表情，我想，乾焦Caravaggio這種死刑犯才畫會出彼款畫面──敢講是罪中的人特別表現出對神的向望？
（我欲按怎？）我問我家己。
（你敢毋知影，要對上帝坦白！對你的某坦白啊！雖罔你可能會失去一切，毋過尚起碼，你會得著上帝！）就假若是Caravaggio彼幅圖內面的人底開嘴講話。（敢真的？）事實上，佇這个信仰的內面，我假若毋bat家己決定過啥物……毋乾焦是信仰，應當講，自從我為著佮家財萬貫的妻結婚，我的心就拍賣去矣，就失去我家己的主意矣敢毋是……
曾麗雲水腫的面直直佇我的頭殼膏膏纏。到旦我才知影，外表生甲普通的曾麗雲，遂是傷過古意的查某囡仔，甚至伊彼暝會答應綴我去旅社，可能嘛是為著欲傾〔khîng〕錢替一个無路用的查甫人還檄數爾爾……我想著伊的腹肚，內面的囡仔可能是我的，心肝穎仔就閣搐一下……而且伊是彼款看著青暝阿婆底賣彩券，會講出「若是行過無買，我就會直直想這件代誌」的善良的查某囡仔……我回想彼暝的情形，我感覺伊的心有一種高貴；阿佮伊比，我規个人汰膏甲家己看袂落去──（哼拄才閣有人想著家己的前途，開嘴要伊給囡仔提掉的呢！）──我毋bat有過hiah呢見笑的感覺！
我沓沓仔清醒：目下，承認一切可能較簡單規氣──這尚起碼是一个家己做 的決定矣。雄雄，妻所講的「罪」的想法，假若sih-nah sih過我的心。
雨的聲漸漸恬落來。
我考慮了，決定敲電話予曾麗雲。
「喂──」伊佇電話彼頭的聲小可驚惴〔tshuah〕。
「我是Arthur。我給妳講，若妳欲給囡仔生落來，我會想辦法。我會先給阮某講。」
「敢真的？」
我聽見伊佇電話彼頭底哭。
「毋免啦，Arthur董的，因為我已經決定矣，囡仔是我的，這个囡仔我會家己io大漢，你毋免管我……」
伊給電話掛斷。
我閣給敲幾若遍，伊無閣接。
（唉這个憨查某！）
我轉去到厝，猶袂踏入門，就聽見客廳嘻嘻哈哈的聲，假若底慶祝啥物。
（敢會是啥人生日我袂記tsit？）我佇心內暗想。
才行到門口欲扲鎖匙，妻就給門打開迎接我。「轉來矣啦！」伊斡頭給厝裡的人客講：「這个新科的爸爸轉來矣啦！」續落是一陣笑聲。
我驚一趒。（敢講怹發現矣？）夯頭看，我的丈人爸佮丈姆攏坐佇客廳。
妻看見我僥疑的表情，就指伊的腹肚講：「你這个憨呆！我今仔下晡用試紙驗過，你欲做爸爸矣啦！有歡喜否？」伊歡頭喜面給我攬咧，繼續大聲講：
「你看，上帝聽我的祈禱，而且，祂定著無閣紀念咱的罪矣啦！感謝主！」
「喔……你拄才欲給我講的代誌就是這？」
「是啊！你假若無外歡喜呢？」
「哈哈，無啦，哪有可能無歡喜？」
「若無，你轉來到旦，目頭結結是底想啥？」
「妳莫烏白想……哪有目頭結結……我只是底想講，哪會到旦無聽著彼隻白耳仔的叫聲？」
「哼，你閣敢講？是毋是你給放走的？」
「無啊！」
「閣講無！我早起欲給飼，就無看著伊的影跡矣呢！閣講毋是你給放走的？伊彼lo神經鳥，飛出去定著袂活的。」
我緊闖到陽台看，果然是空空的鳥籠仔。彼隻白耳仔成實家己飛走矣，籠仔內乾焦偆幾枝仔伊留落來的鳥仔毛……
（哼！確實是有kioh數的鳥啊！）我笑出聲。
妻綴佇我的後壁，講：「你是閣底笑啥？」
我看伊因為有身，表情攏無仝矣，回復到阮拄熟悉的時的輕鬆佮溫柔。我給伊的手牽咧，講：「無啦！咱先入來。我嘛有一項欲給妳講。」
「佗一項？」
「妳要先答應我，袂使受氣，按呢我才講。」
「好！我答應你！」
我雄雄聽著鳥仔飛過的聲，夯頭，真奇怪，啥物攏無看著。風吹來，有幾片樹葉仔飄佇空中。我想起Dante寫的：「我哪會行入樹林內面，我家己嘛無清楚，乾焦知影佇愛睏盹龜的時，我就離開正路。」我發覺一路綴我轉來的彼二蕾目睭，毋知當時已經匿無去矣！